LAURA VILLAVERDE nace en Tui no 1984 é actriz, creadora escénica, creadora de contidos, produtora e xestora cultural galega. Licenciada en Arte Dramática pola ESAD de Galicia (2006-2010) e cun Mestrado en Servizos Culturais pola USC (2022-2023).
Completou a súa formación no campo da interpretación en Nova York (2010-2012) da man de SITI Company/Anne Bogart, especializándose en Viewpoints, método Suzuki e composición escénica.
Profundizou en técnicas do corpo, movemento e danza con compañías e creadoras/es como The Bill T. Jones/Arnie Zane Dance Company, Temple Theatre, Ana Serna, Jordi Cortés, Lauren Atanes, Julio Castronuevo e José Piris, entre outras/os.
Foi bolseira do programa de adestramento internacional da universidade norteamericana Skidmore College para formar parte do Summer Theater Workshop en Saratoga, Estados Unidos.
Introduciuse na escena internacional coa súa obra Uvas de Collón de Ghalo, presentada en Colombia, Porto Rico e Nova York entre 2012 e 2013. En Nova York participou tamén en Café Variations, baixo a dirección de SITI Company/Anne Bogart, no teatro New York Live Arts.
Formou parte do elenco do Centro Dramático Galego como actriz principal en dúas producións dirixidas por José Caldas (2014) e Gena Baamonde (2019).
No ámbito audiovisual destaca a Axuda ao Talento Audiovisual Galego de AGADIC recibida para Ursúas, a súa primeira longametraxe, que protagoniza e produce, dirixida por Roi Fernández e seleccionada no Festival Internacional Play-Doc 2026. Tamén é destacable o seu traballo nas curtametraxes do premiado director Alex Lora, así como a súa colaboración como actriz no programa de dirección cinematográfica do City College of New York, dirixido por Chantal Akerman.
En 2012 fundou Artesa Cía, compañía coa que desenvolveu unha ampla traxectoria como actriz, creadora, dramaturga, produtora e distribuidora en teatro contemporáneo, creación colectiva, escena expandida, audiovisual e formatos transmedia. A compañía actuou en numerosos teatros e auditorios de Galicia, cun total de preto de 300 funcións.
Entre as súas creacións destacan Illas Desertas, seleccionada pola Rede de Teatros Alternativos de España; H/OSTIA, proxecto de creación colectiva e horizontal entre Nova York, Madrid e Galicia, apoiado polo Colectivo RPM cunha Residencia Paraíso 2020; e Panos de Vinaghre , obra pola que foi galardoada co premio á Mellor Interpretación, no Festival Internacional Outono de Teatro de Carballo, entre outras propostas escénicas vinculadas á creación contemporánea, á identidade galega, ao corpo e ás linguaxes híbridas.
De 2013 a 2016 crea e codirixe Extramuros ( Espazo de Colisións Artísticas), na Coruña, un espazo interdisciplinar de creación, encontro e exhibición escénica.
En 2020 funda A Estraperlista, asociación artística e cultural situada no medio rural, concibida como laboratorio de creación escénica, investigación artística e intercambio cultural, onde continúa desenvolvendo procesos de creación coa súa compañía.
O seu perfil combina versatilidade interpretativa, traballo corporal, identidade galega, creación de personaxes, xestión cultural, docencia artística e unha longa experiencia en procesos de creación propios e colectivos.